آخ ماجفتوا الابره شطولها ماجفتوها يمممه تخوف تخوف

بسم الله واعوذ بالله .. وبأسمه توكلنا

اليوم اهو يوم عمليتي
انه عبالي العمليه بتطول وبيرقدوني وقالبه الدنيا فوق تحت

المهم انه مواصله ومارقدت ،، وكنت أحاتي العمليه وواايد

صليت وتسبحت وغسلت ويهي وقمت باروح المستشفى ،، طلعت من البيت الساعه 7

وموعدي الساعه 8 ونص ،،

دشيت المستشفى الا صخه وماكو أحد ،، أنه قلت أكيد اليوم محد بيداوم

نسيت أن أحنه في رمضان والدكاتره مايوصلون الا 8 او 8 وشي ،،

عاد تميت قاعده على الكراسي ومافيه الا اربعه بحرينين ينظفون المكان

ويات 7 ونص ومحد بالمستشفى غير صوت الادوات مال التنظيف

وانه ميته من الخوف لانه كنت بروحي وماكو احد غير هالاربعه الاشخاص ،،

وشوي الا داش علينا هندي اهني انه ارتاحيت شوي ،، ماجوف الا الاخ لابس مال النظافه وقاعد ينظف

يعني طلع تابع لهم

وتميت قاعده بروحي ليما طقت الساعه 8 اهني شويه بدت الحركه ،، جفت صبي داش

وعقب دشت مره عوده ويا ولدها وآخر شي ياو الممرضات والدكاتره بعد عناء طويل

تقريباً يات الساعه 8 ونص الا مصوتين بأسمي الكريم خخخخخ

دشيت وانه ميته من الخوف في نفس الوقت قاعده اشجع روحي واقول لا انشاءالله يعدي كل شي على خير

اقولكم دشيت الا يقولون لي انسدحي على السرير

وه بعد قالت لي جذي جان أتصروع من الخوف

قلت لها لالا باتم قاعده ! الا تقول لي الدكتوره شلون قاعده والعمليه تحتاج آلاات وعفسه مابتقدرين اتمين قاعده وماده ريلج

طافت دقايق وجان اشوف روحي مسدوحه على السرير

والابره الطويله صوبي يمممممممممه والاجهزه تخرع من كل صوب

قلت لها الحين انتي بتطقيني ابره؟ قالت لي اي مو بس ابره الا ابرتين وحده صغيره ووحده عوده

يات اللحظه الصعبه الا اهي بتطقني فيها الابره وقالت لي يبي لج شويه صبر وتحمل

قلت لها يختج انه مافيني صبر وماقدر اتحمل الالم ،، قالت لي لا اهم شي الابره لانها مجرد بنج وعقب مابتحسين بشي

قلت اوكي خل اصبر واتحمل !! شوي والا الاخت مدخلة الابره اللي شطولها حسيت بنغزه وصرخت صرخه

اتقول لي ويييي جنج ياهل خخخخخ قلت لها قولي اللي بتقولينه بس الابره لاتقربينها صوبي

ومن سوء حظي ان الابره الاولى ماطلع فيها البنج كامل فأضطرت تآخذ أبره ثانيه أطول منها

عاد انه اهني وصلت حدي قمت اربط في ريولي واحرك في شعري وشيلتي انفصخت وحالتي حاله بس لانها بتدخل الابره الثانيه

انزين دخلت الابره وانه اصرخ وحالتي لا يرثى لها !! عقب ماذبحتني والبنج دخل في ريلي اهني شوي ارتاحيت

وكل شوي واقول لها ها دكتوره كملتي قالت لي لا للحين بقى وايد خخخخخخخخ ومن اتقول بقى وايد احط راسي وارقد

خلصنا من الابره الحين شوي والا مطلعه لي آله تخرع جنها سجين !! وقف قلبي قلت لها لا مابي لاتسوين لي شي

اتقول لي انتي رقدي ولا عليج !! بذمتها بس شلون بارقد او باقدر احط راسي وهالأدوات والابر كلها صوبي

انزين عاد دخلنا في العمليه الحين !!

يودت ريولي وجان تقص مكان الجرح بالموس ،، آآآآآآآآخ صج صج صج كان يعور مع
ان ريولي كانت مبنجه

وعقب ماقصته اقعدت تحرق ريولي ليمن اوصلت للجذور وانه ميته ألم واصرخ ودموعي على خدي جني ياهل

بس صج الالم كان فضيع حده ،، وآخر شي لفت لي ريلي وقالت لي بعد لج موعد عشان تنظفينها كل اسبوع

والحمدلله بعد هالمعاناه ارتاحيت شوي ،، بس صدقوني مب قادره احط ريولي ع الارض ولا اقدر امشي ولا اتحرك

.. وشكلي اليوم باصلي وانه قاعده ..

والقهر رديت مشي على ريولي من البيت لي المستشفى ! وبين البيت والمستشفى يمكن ربع ساعه

المكان / غرفه العمليات
التاريخ / 18/اكتوبر/2005

،، تحيوتي لكم بقصه ثانيه من عالمي الخاص ،،

دلعلع